پرەمەر-مينيستردىڭ ورىنباسارى ەرالى توعجانوۆ قازاقستاننىڭ بوستاندىعى مەن تاۋەلسىزدىگى جولىندا قۋعىن-سۇرگىن قۇرباندارى بولعان ازاماتتاردىڭ ەڭبەگى مەن ەرلىكتەرىن ماڭگى ەستە قالدىرۋ جونىندەگى ارنايى جوبا ازىرلەنىپ جاتقانىن حابارلادى.

ونىڭ ايتۋىنشا، بۇگىندە نۇر-سۇلتان قالاسىندا "الاش" قوزعالىسىنىڭ 30 شاقتى تۇلعاسىنا كوشە اتاۋلارى بەرىلگەن. ونىڭ ىشىندە، ماعجان جۇمابايەۆ، ءاليحان بوكەيحان، احمەت بايتۇرسىن ۇلى، ءاليحان ەرمەكوۆ، جاھانشا دوسمۇحامەد ۇلى، مۇستافا شوقاي، حالەل دوسمۇحامەد ۇلى، حالەل عابباس ۇلى، ءۋاليتحان تاناش ۇلى، ايدارحان تۇرلىباي ۇلى، مۇحامەدجان تىنىشباي ۇلى، جاقىپ اقباي ۇلى، اسپانديار كەنجە ۇلى، ءمىرجاقىپ دۋلات ۇلى، قوشكە كەمەڭگەر ۇلى، عۇمار قاراش، شاكارىم قۇدايبەردى ۇلى، شايمەردەن قوسشىعۇل ۇلى، سۇلتانبەك قوجان ۇلى، ءبىرىمجانوۆتار، ءنازىر تورەقۇل ۇلى، سماعۇل سادۋاقاس ۇلى، حايرەتدين بولعانباي ۇلى، سۇلتانماحمۇت تورايعىر ۇلى، جۇسىپبەك ايماۋىت ۇلى، تەلجان شونان ۇلى، قانىش ساتبايەۆ، مۇحتار اۋەزوۆ اتىنداعى كوشەلەر بار.

– ەلىمىزدىڭ ازاتتىعى ءۇشىن كۇرەسكەن الاش قايراتكەرلەرىنىڭ ەسىمدەرىن ماڭگىلىك ەستە ساقتاۋ ماقساتىندا 2020 جىلى نۇر-سۇلتان قالاسىنىڭ ءبىلىم بەرۋ ۇيىمدارىنا احمەت بايتۇرسىن ۇلىنىڭ، ءاليحان بوكەيحاننىڭ، شاكارىمنىڭ ەسىمدەرى بەرىلدى. قازىرگى ۋاقىتتا تاۋەلسىزدىگىمىزدىڭ 30 جىلدىق مەرەيتويى قارساڭىندا ەلوردانىڭ ءبىرقاتار ءبىلىم بەرۋ مەكەمەلەرىنە ءنازىر تورەقۇلوۆتىڭ، مۇستافا شوقايدىڭ، قوشكە كەمەڭگەر ۇلىنىڭ، قانىش ساتبايەۆتىڭ، سماعۇل ءسادۋاقاس ۇلىنىڭ ەسىمدەرىن بەرۋ ماسەلەسى قاراستىرىلۋدا، – دەدى ول اقجول پارتياسىنىڭ دەپۋتاتتارى جولداعان دەپۋتتاتتىق ساۋالعا جاۋابىندا.

سونداي-اق ەرالى توعجانوۆ مەملەكەتتىك حاتشىنىڭ توراعالىعىمەن ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيا قۇرىلعانىن، ونىڭ قۇرامىنا قوعامدىق ۇيىمداردىڭ وكىلدەرى مەن عالىمدار، پرەزيدەنت اكىمشىلىگى مەن ۇكىمەت وكىلدەرى، دەپۋتاتتارى، مۇددەلى مەملەكەتتىك ورگانداردىڭ باسشىلارى كىرگەنىن ايتتى.

مۇراعات كوزدەرى مەن باسقا دا ماتەريالداردى جيناۋ، زەردەلەۋ، مەملەكەتتىك كوميسسياعا قورىتىندىلار دايىنداۋ جونىندەگى 11 باعىت بويىنشا جۇمىس توپتارىنىڭ قۇرامى بەكىتىلگەن. 

– سىزدەردىڭ 700-دەن استام تۇلعانى قۇرايتىن الاش قايراتكەرلەرىنىڭ ءتىزىمى مەملەكەتتىك كوميسسيا قىزمەتىن سۇيەمەلدەۋ جونىندەگى جوبالىق وفيسكە، سونىمەن بىرگە ءتيىستى جۇمىس توبىنا جولدانىپ، قاراۋ ناتيجەلەرى عالىمداردىڭ مۇراعاتتاردا جۇرگىزگەن جۇمىس قورىتىندىلارىنا سايكەس ۇسىنىلاتىن بولادى. جالپى، بارلىق زەرتتەۋ جانە ىزدەستىرۋ جۇمىستارى اياقتالعاننان كەيىن قازاقستاننىڭ بوستاندىعى مەن تاۋەلسىزدىگى جولىندا قۋعىن-سۇرگىن قۇرباندارى بولعان ازاماتتاردىڭ ەڭبەگى مەن ەرلىكتەرىن ماڭگى ەستە قالدىرۋ جونىندەگى ارنايى جوبا ازىرلەۋ جوسپارلانۋدا، – دەدى ول.